ಚೆಂದವಳ್ಳಿ ತೋಟದಲ್ಲಿ
ಅರಳಿನಿಂತ ಗುಲಾಬಿ ಹೂವೆ
ಚಂದದೂರ ಚೆಲುವೆ ನೀನು
ನಿನ್ನಂದಕೆ ಸಾಟಿಯಾರೇ ..

ಮಧುವರಸಿ ದುಂಬಿಯೊಂದು
ಸುಳಿಯುತಿಹುದು ಸುತ್ತಮುತ್ತ
ಒಲವ ಸುಧೆಯ ಹೀರೊ ಬಯಕೆ
ಜಾಣ ಕುರುಡು ಹೂ ಮನಕೆ ...

ಮನಸು ಒಂದು ಮಲ್ಲಿಗೆ ದಂಡು
ನೆನಪು ಸೆಳೆವ ದಾಸವಾಳ
ರೇಷ್ಮೆ ಕೂಡ ನಾಚುತಿಹುದು
ನಿನ್ನ ಕೆನ್ನೆ ನುಣುಪು ಕಂಡು ...

ಚಂದ್ರತಾನು ಚಿಂತಿಸುತಿಹನು
ಭುವಿಯ ಮೇಲೆ ನಿನ್ನ ನೋಡಿ
ಹಾಲಿನಂತಹ ಬೆಳಕ ಮುಂದೆ
ತನ್ನ ಬಿಂಬ ಸಪ್ಪೆ ಎಂದು ...

ನನ್ನ ಸ್ನೇಹ ಸಾಗರದಲ್ಲಿ
ಈಜಿ ಬಂದ ನಕ್ಷತ್ರ ಮೀನೆ
ಸಾಗುತಿರಲಿ ಸಾಗರಯಾನ
ಉಸಿರು ತಾನೇ ಸೋಲೊವರೆಗೆ ...

ಚೆಂದವಳ್ಳಿ ತೋಟದಲ್ಲಿ
ಅರಳಿನಿಂತ ಗುಲಾಬಿ ಹೂವೆ
ನನ್ನದೊಂದು ನೆನಪಿರಲಿ
ನಿನ್ನ ಮಧುರ ಮನಸಿನಲಿ ..!!